سمجھ نہیں آتا کہ ہم کہاں کھڑے ہیں؟ ہمارے معاشرے میں عدم برداشت کا گراف اس حد تک بڑھ چکا ہے کہ اب رشتے، محبتیں اور خون کی سفیدیاں سب ختم ہوتی جا رہی ہیں۔ جن گھروں کو سکون کا گہوارہ ہونا چاہیے تھا، وہ اب مقتل گاہیں بن چکے ہیں۔ اپنے ہی اپنوں کے خون کے پیاسے ہو گئے ہیں، غصہ اور انا اتنی بڑی ہو گئی ہے کہ لوگ اپنے جگر کے ٹکڑوں کی جان لینے سے بھی نہیں کتراتے۔
پچھلے محض ایک ہفتے کے اندر پاکستان میں فیملی کے اندر تشدد اور قتل کے ایسے دردناک واقعات سامنے آئے ہیں جنہیں سن کر روح کانپ جاتی ہے۔ صرف پچھلے چند دنوں کے یہ دل دہلا دینے والے واقعات دیکھیے:
جہلم (دینا): ایک باپ نے اپنی بیوی سے جھگڑے کے بعد اپنے تین معصوم بچوں کو ہنستا کھیلتا لے جا کر نہر میں پھینک دیا۔ دو ننھی بچیوں (فجر اور نور فاطمہ) کی لاشیں مل گئیں، جبکہ 5 سالہ بیٹا تاحال لاپتہ ہے۔
کراچی (لی مارکیٹ): ایک ہی گھر کے اندر ایک شخص نے چھری کے وار کر کے اپنی چار قریبی خواتین (پوپھو، کزن، بھابھی اور ننھی بھانجی) کو بیدردی سے قتل کر دیا، صرف اس لیے کہ وہ ان کے سوشل میڈیا استعمال کرنے پر غصے میں تھا۔
کراچی (سرجانی ٹاؤن): ایک اور لرزہ خیز واقعہ، جہاں ایک بہنوئی نے اپنی رشتہ دار خاتون اور اس کے تین معصوم بچوں (جن کی عمریں ڈیڑھ سے 6 سال تھیں) کو لوہے کی راڈ مار مار کر بے دردی سے موت کے گھاٹ اتار دیا۔
جرانوالہ: یہاں ایک عورت نے گھریلو ناچاقی اور مالی تنگی سے تنگ آ کر سوتے ہوئے اپنے شوہر کو چاقو کے وار کر کے قتل کر دیا اور اپنی ہی تین معصوم بیٹیوں کو بھی شدید زخمی کر دیا۔
سیالکوٹ: گھریلو تنازع کے حل کے لیے پنچایت بیٹھی تھی کہ وہاں ایک بھائی نے طیش میں آ کر سب کے سامنے اپنی ہی شادی شدہ بہن پر گولیاں چلا دیں اور اسے موقع پر ہی قتل کر دیا۔
سوچنے کا مقام! آخر ہم بطور معاشرہ کہاں جا رہے ہیں؟ یہ کون سا دین، کون سی تہذیب اور کون سی تربیت ہے جو ہمیں اپنوں کا ہی گلا کاٹنا سکھا رہی ہے؟ کیا ہماری ذہنی صحت اس حد تک برباد ہو چکی ہے؟
جب تک ہم اپنے غصے پر قابو پانا، رشتوں کا احترام اور ایک دوسرے کو برداشت کرنا نہیں سیکھیں گے، تب تک ہم ایسے ہی اندھیروں میں ڈوبتے رہیں گے۔ خدارا! اپنے گھروں میں محبت بانٹیں، بچوں کی تربیت پر توجہ دیں، اور اپنے پیاروں کے رویوں پر نظر رکھیں اس سے پہلے کہ بہت دیر ہو جائے۔
اللہ پاک ہمارے حال پر رحم فرمائے اور ہم سب کے گھروں کو امن و امان کا گہوارہ بنائے۔ (آمین)
